LAOAG CITY – Nakaruaren iti balay-pagagasan ti biktima iti pammagkong iti Brgy. Palongpong iti siudad ti Batac.
Segun ken ni PSSgt. Michael Queberal, Imbestigador iti Batac City Police Station, basar iti pannakisarsaritana iti biktima ket nakadepende ti agbalin a desision ti boss-na no mapilaan ti kaso ti suspek.
Inbatadna nga iti agdama ket nagtalinaed iti kuerpo ti pulisia ti suspek kabayatan a maiyur-uray ti maiyatnag a desision.
Maipalagip a binagkong ti maysa nga helper ti padana nga helper iti Brgy. Palongpong iti siudad ti Batac.
Nabigbig ti biktima a ni Khasi John Rabe, awanan asawa, agtawen iti 23 ken residente ti Brgy. 6 Minanga, Claveria, Cagayan idinto a nabigbig met ti suspek a ni Rogeilio Antonio y Agnaray, naasawaan, agtawen iti 40, helper ken residente ti Brgy. Aga-ga iti ili ti Burgos.
Basar iti imbestigasion, agarup 9:59 ti rabii idi Setiembre 6 idi napasamak ti pammagkong iti Brgy. Palongpong iti siudad ti Batac kangrunaanna iti pagtaengan ti agnagan ti Ferdinand Ricardo.
Mainaig iti daytoy, sakbay ti napasamak nga insidente ket nagiinum ti biktima, suspek ken dagiti katrabahoanda agingga a nagbinnara dagiti dua a maseknan.
Naammoan a nagtalinaed ti biktima iti lugar a nagiinumanda idinto a ti suspek ket simrek iti pagtaengan ti boss-da ket ditoy a nangala ti kutsilyo.
Gapu iti daytoy, kinomprontar ti biktima ti suspek agingga a nagririda no sadinno a dinanog ti biktima ti suspek rason a binagkong ti suspek ti biktima iti naminsan a daras iti akin-kannigid a bakrang daytoy nga inanawa met dagiti kaubraanda.
Kabayatanna, naduktalan nga inpurwak ti suspek ti inusarna a kutsilyo iti kapagayan.
