LAOAG CITY – Inpakaammo ni Brgy. Chairman Rheanie Calaro iti Brgy. 23, San Andres iti ili ti Sarrat a saanen a mangipila ti reklamo ti biktima a nakagat ti aso iti barangayda.
Nupay kasta, inlawlawagna a napagnunumoanda nga ipaayan ti akin-taraken ti aso ti pagplete ti biktima nga agturong iti Animal Bite Center ditoy probinsia tapno agpatudok ti anti-rabies vaccine.
Segun kenkuana, dagus daytoy a trinatar ti Barangay Council apaman nga adda ti naawatda a report maipapan iti taraken nga aso iti kabarangayanda nga agkamat kadagiti residente.
Inpettengna nga insigida a napan nakisarita ti Sitio Kagawad a ni Barangay Kagawad Heidi Calaro iti akin-taraken ti aso tapno igalot daytoy banag a nagtungpal met ti maseknan.
Inpasigurado ni Kapitan Calaro a nabakunaanen iti anti-rabies vaccine dagiti amin nga aso iti barangayda ngem masapol nga agbalin a responsable ti panagtaraken ti aso tapno awan ti maapektaran.
Mainag iti daytoy, inadmitirna a dakkel a karit kadakuada dagiti walang nga aso gapu ta awan pay ti naestablisar a bukudda a dog pound nga isu ti pakaikabilan koma dagitoy.
Kabayatanna, naammoan nga iti napalabas a tawen ket adda ti pimmusay a kabarangayanda a nagpositibo iti rabies rason ti naiget a panangipakatna kadagiti pagannurutan tapno maliklikan a maminsan manen a mapasamak.
