LAOAG CITY – Ngimmato ti bilang dagiti behikulo a nailako iti pagilyan iti Agosto nga umabot iti 6.6 percent.
Basar iti joint report ti Chamber of Automotive Manufacturers of the Philippines Inc. (CAMPI) ken Truck Manufacturers Association (TMA), umabot iti 39,155 units iti bulan ti Agosto ti nailako, nangatngato ngem iti 36,714 units iti kapada a bulan iti napan a tawen.
No ikumpara met iti 39,331 units a nailako idi Hulyo, ti motor vehicle sales iti August ket bimmaba iti 0.4 percent.
Inbatad pay dagitoy a ti passenger car sales iti Agosto ket bimmaba iti 5.6 percent agingga iti 9,529 units manipud iti 10,094 units idi naminsan a tawen.
Kabayatanna, ti naglakoan iti commercial vehicles ket ngimmato iti 11.3 percent agingga iti 29,626 units idi Agosto manipud iti 26,620 units iti kapada a bulan iti napalabas a tawen..
Manipud iti Enero agingga iti Agosto, inbatad ti Chamber of Automotive Manufacturers of the Philippines Inc. (CAMPI) ken Truck Manufacturers Association (TMA), a ti kadagupan a nailako ket 304,765 units, 10.3 percent a nangatngato ngem iti 276,215 units iti kapada a panawen idi 2023.
