LAOAG CITY – Agtultuloy a bumabbabba ti bilang dagiti padi iti Pilipinas.
Daytoy ket basar iti datos ti Catholic Bishops’ Conference of the Philippines (CBCP).
Iti baet daytoy, agtultuloy ti panagdur-as ti populasyon dagiti Katoliko iti pagilian.
Maipalagip nga idi 2016, nairekord ti sumuruk-kumurang a 61.6 million a Katoliko, ngem apaman a nadanun ti 2025 ket umaboten iti nasurok a 73.6 million.
Manipod 12,964 idi 2016, bimmaba daytoy iti 10,178 laengen iti napalabas a tawen.
Maibilang daytoy a dakkel a karit para iti Simbaan Katolika aglalo ket ngumatngato ti pagkasapulan iti pastoral iti panagserbi.
Karaman kadagiti makitkita a rason iti panagbaba ket ti nangato a matrikula kadagiti seminaryo, ti nadagsen a responsibilidad iti pamilya, ken ti proseso ti internal discernment iti maaw-awagan a bokasyon.
Gapu iti daytoy, nagtalinaed a karit para iti Simbaan no kasanu a magutigot ti ad-ado nga agtutubo a sumrek iti panagpadi iti baet ti dumakdakkel a bilang dagiti katolika iti pagilian.
