LAOAG CITY – Inpasingked ni Bombo International News Correspondent Fermin Ulit, iti South Carolina, USA ngem tubo iti siudad ti Batac a napintas ti laban da US President Donald Trump kenni Democratic Nominee Joe Biden.
Nu pay kasta, kuna ni Ulit a ti kangrunaan a pagibasaran dagiti botante iti nasao a lugar ket iti naaramidan dagiti kandidato.
Patien na gapu iti daytoy ket dakkel ti tyansa ni Trump a makaukkon ti nangato a butos iti estado da.
Inkalintegan na a babaen iti liderato ni Trump ket nagtutuloy ti napintas nga ekonomiya iti nasao a lugar.
Kuna ni Ulit a dakkel ti asset ni Trump gapu iti kaadda ti kapanunutan na nu maipanggep iti negosyo.
Mainaig iti daytoy, kuna na a nu pay ado dagiti mangkonkondenar kenni Trump iti pananglaban ti estados unidos iti covid-19 ket ad-ado latta ti naaramidan na ngem iti kalaban na a ni Biden.
