LAOAG CITY – Nagpila ti reklamo kriminal ti Bureau of Internal Revenue (BIR) iti Department of Justice kontra kada Herminio “Harry” Roque Jr., Mylah Reyes Roque, ken Percival Sazon Ortega mainaig kadagiti panaglabsing ti buwis nga adda ti pakainaigan ti Biancham Holdings and Trading, Inc.
Basar iti imbestigasyon ti Bureau of Internal Revenue, napaay dagiti maseknan a nangisumitir ti kasapulan a tax returns ken nagbayad ti umiso a buwis iti panangiyakar ti shares of stock ken iti panagngato ti authorized capital stock.
Mapatta-patta nga umabot iti nasurok a P3.35 milyon ti pakabuklan a tax deficiency, karamanen ti surcharges ken interes.
Nakakita ti probable cause ti Bureau of Internal Revenue tapno kasoan dagiti Roque ken ni Ortega a nangiranta a mangliklik iti panagbayad ti buwis iti babaen ti Section 254, ken ti saan a panangisumitir ti tax returns iti babaen ti Section 255 ti National Internal Revenue Code of 1997, a naamendaran.
Malaksid iti daytoy, nagpila pay ti Bureau of Internal Revenue ti dua a nagsina a kaso kontra iti Terjonan Transport Company Inc. ken dagiti opisyal na nga isuda Rhodora Andrada Zamora ken Maria Teresa Emflorgo Sarmiento gapu iti saan a panagbayad ti Value-Added Tax (VAT) para iti tawen 2017 nga agbalor ti P9.178 milyon.
Inbatad ni Commissioner Charlito Martin R. Mendoza a ti panagpila kadagiti kaso ket paset ti agtultuloy a panangipatungpal ti Bureau of Internal Revenue ti Run After Tax Evaders (RATE) program iti babaen ti Revenue Collection and Base Protection pillar ti DARES reform program.
