LAOAG CITY – Inlawlawag ni Konsehal Leah Buduan iti ili ti Paoay ti alegasyon kontra kenkuana a naidanun ditoy Bombo Radyo Laoag.
Daytoy ket mainaig ti maipagarop a panaglabsing ti covid-19 protocol babaen iti iruruwar na manipud iti panag-quarantine na a saan pay a nalpas ti pito nga aldaw.
Segun ken ni Buduan, nagkamali ti panagbilang gapu ta imbes nga intono bigat koma pay laeng ti iruruwar na ket napanen iti clinic na ita nga aldaw, Enero 10.
Inbatad ni Buduan nga idi Lunes, Enero 3 a naudi a nakapulapol na ti maysa nga staff iti konseho iti ili ti Paoay a nagpositibo ti antigen test na.
Innayon na nga imbes a nangrugi a nagbilang iti Enero 4 ket Enero 3 nangrugian na a nagbilang rason nga inpagarop na nga idi kalman ket mabalin nan ti rumuar.
Mainaig iti daytoy, inpakaammo ni Doctor Cherry Pamu, ti Municipal Health Officer iti ili ti Paoay nga idi naamoan da a rimuaren ni Konsehal Buduan ket tinawagan da ken pinagsubli da iti panagquarantine na.
Kabayatanna, naglikudan ni Vice Mayor Lucky Domingo iti ili ti Paoay ti alegasyon a rimuar idi biernes ken sabado iti baet a naka-quarantine daytoy kalpasan a nagpositibo iti antigen test ti maysa nga staff iti konseho ti nasao nga ili.
Inpasingked na a saan pulos a rimrimuar kadagiti nadakamat nga aldaw.
Immuna iti daytoy, iti naidanun a report ditoy Bombo Radyo Laoag ket maipagarop a rimuar ni Domingo idi biernes ken sabado no sadinno a napanna kinataripnong dagiti mannalon iti Barangay Surgui iti nasao nga ili.
Nupay kasta, iti pannakiinnuman ti Bombo Radyo Laoag iti maysa a mannalon iti nasao a lugar ket naibaga na a saan a biernes ken sabado ti panagturong ti bise mayor no di ket iti aldaw ti huwebes no sadinno a napanna laeng intulnog ti backhoe.
Inbatad met ni Doctor Puma a mabalin a saan pay a naamoan ti bise mayor ti resulta ti antigen test ti staff da iti dayta a gundaway gapu ta rabii laeng a rimuar.
Nupay kasta, kuna na nga inyuman nan daytoy a banag iti opisina ti mayor iti nasao nga ili ken isuna ti mangdesisyon no adda ti maiyuswat nga imbestigasyon tapno maamoan ti pudno a napasamak.
