LAOAG CITY – Nangiyuswat ti Black Valentines’ Day Protest ti Ilocos Norte Electrict Cooperative (INEC) iti daytoy nga aldaw a pannakaselebrar ti Valentines Day konta iti Department of Energy.
Daytoy ket gapu ta karaman ti INEC kadagiti 17 nga electric cooperative ditoy pagilyan a plano ti DOE nga ikkaten ti franchise na.
Naamoan a kas paset ti Black Valentines’ Day Protest ket nagbado amin nga empleado iti INEC ti nangisit.
Malaksid ti daytoy, uray dagiti tarpaulins a nakabitin ket agmaris ti nangisit.
Inbatad ni INEC general manager Engr Bing Agdigos a gagem ti inyuswat da nga addang a lapdan ti plano ti DOE gapu ta no agballigi ti ahensya a mangikkat ti franchise dagiti 17 nga electric cooperatives a pakairaman ti INEC ket manamnama a ngumato ti singir ti kuryente.
Daytoy ket gapu ta possible a maipaiman ton dagiti kooperatiba kadagiti pribado a negosyante.
Maipalagip nga inrekomendar ni Energy Secretary Alfonso Cusi iti kongreso ti panangkanselar da ti prangkisa dagiti nasao a kooperatiba gapu ti maipagarop nga underperformance ken saan a napintas ti sitwasyon ti estado ti pinansyal.
