LAOAG CITY – Inbatad ni Akbayan Party-list Rep. Chel Diokno a respetarenda ti prosecution team ti agbalin a desision ti Senate impeachment court iti voting threshold a maaramat para iti panagdesision iti conviction ni Vice President Sara Duterte iti impeachment trial-na.
Segun ken ni Diokno, saan a nakapokus ti prosekusion iti bilang ti botos a masapol para iti conviction no diketdi, nakapokusda iti panangilanadda ti natibker nga ebidensia tapno masuportaran ti kasoda kontra ken ni Duterte.
Naikeddeng inton Martes, Setiembre 23, ti oral arguments ti prosecution ken defense mainaig iti 16-vote threshold para iti conviction ni Duterte.
Pimmudot ti isyu iti voting threshold kalpasan a nagkiddaw ti Senate impeachment court ti opinyon dagiti dati a mahistrado ti Supreme Court no masapol a mairaman iti bilang ti botos dagiti senador a nakabalud, aglemlemmeng ken manarimaan nga agtaltalinaed idiay ballasiw taaw.
Mainaig iti daytoy, tallo kadagiti legal experts a naimbitaran kas amici curiae ti nangibaga a mabalin a baliwan ti impeachment court ti manarimaan a 16-vote threshold para iti conviction, basar iti pannakabalin ti Senado a tingitingen ken agdesision kadagiti impeachment case.
Iti sabali met a bangir, adda met ti salungat nga opinyon dagiti dati a mahistrado a masapol nga agtalinaed a nakabasar iti pakabukelan a 24 a miembro ti Senado ti two-thirds requirement nga inkeddeng ti Konstitusion.
Kabayatanna, dagiti Senador a saan nga aktibo a nakaatatendar iti panagusig ket da Sen. Jinggoy Estrada ken Sen. Rodante Marcoleta nga agpada a nakabalud gapu iti sangsangoenda nga agsina a kaso a plunder. Saan met a masinunuo ti paglemlemmengan ni Sen. Ronald “Bato” dela Rosa bayat ti inparuk-at a International Criminal Court nga arrest warrant kontra kenkuana.
