LAOAG CITY – Agamak ni Dr. Medeldorf Gaoat, Chairman ti Committee on Health ti Sang. Panlalawigan nga umado manen ti kaso a dengue iti panangrugin ti panawen ti tudtudo.
Imbatadna a nupay saanna a mairakurak ti bilang ti agdama a kaso ti dengue ditoy probinsia ket kas maysa a doctor maobserbaran na nga adda dagiti pasiente nga kasapulan a mataming gapu iti nasao a sakit.
Inlawlawagna a no makitada a nababa ti platelet ti pasiente ken maatap a nakaptan ti sakit a dengue ket dagus a ma-admit dagitoy iti ospital.
Inannugot na a narisgo ti nasao a sakit isut gapuna a saan a rumbeng a mabaybay-an dagiti pasiente.
Mainaig iti daytoy, inbalakadna kadagiti adda ti gurigor ken agsaksakit ti ulo na nga agpakunsultar a dagus iti doctor.
Malaksid iti daytoy, ginutigot na dagiti umili nga itultuloy dagiti “hygienic practices” a nairugi kabayatan ti pandemia a gubuay ti COVID-19 kas iti panangkalub iti agong ken ngiwat no aguyek.
Kabayatanna, inpagunam-gunam ni Gaoat nga ugalien ti agdalus iti aglawlaw gapu ta isu ti kangrunaan a makatulong tapno maliklikan ti panagsakit iti dengue.
Kunana a masapul a siguradoen nga awan ti pagurnungan ti danum a mabalin a pagbalayan dagiti kiti-kiti nga agbalin a lamok a carrier ti sakit a dengue.
Innayon na a no adu dagiti makita a naummong a danom ket ipakaammo kadagiti maseknan nga ahensia kas iti Rural Health Unit, Municipal wenno City Health Office ta isuda ti makaammo kasanu a patayen dagiti kitikiti.
