LAOAG CITY – Agpada a naitaray iti Governor Roque Ablan Senior Memorial Hospital (GRASMH) ditoy ciudad ti Laoag ti maysa a menor de edad ken barangay kagawad kalpasan ti napasamak a desgrasya iti Barangay Cadaratan iti Bacarra, Ilocos Norte.
Nabigbig ti Barangay Kagawad a ni Alvin Jimenez y Alacay, agtawen ti 35, residente iti Barangay 27-A, Pungto iti nasao nga ili ken ti agtawen ti 15 a menor de edad a taga Barangay Alejo Malasig iti ili ti Vintar.
Segun ti report, agpada nga agpapa-abagatan a direksyon ti tricycle nga inturong ni Jimenez ken ti motorsiklo nga minaneho ti menor de edad.
Apaman nga adda dagitoy iti paset ti Barangay Cadaratan ket nag-overtake ti nakamotorsiklo ngem isu met ti panagpakannigid a direksyon ti Barangay Kagawad.
Naamoan a nagplasser ti tricycle sakbay a nagpakannigid a direksyon, ngem maipagarop a saan a nakita a dagus ti nakamotorsiklo gapu ti kinapardas na.
Gapu iti daytoy, nasugat ti ulo ti barangay kagawad kalpasan a naipurwak idinto a ti menor de edad ket naiwa ti rupa na ken nagsagaba ti sugat iti nagduduma a paset ti bagina.
