LAOAG CITY – Porsigido nga agipila ti reklamo ni Barangay Treasurer Herminia Baptista Guerero, agtawen ti 52, iti Brgy. Pila ditoy siudad ti Laoag kontra kenni Mr. Emiterio Ramos Baptista, agtawen ti 64 ken residente iti nasao met la a barangay.
Daytoy ket kalpasan a prinobokar ni Baptista ni Guerero babaen iti panangiwaswasawas na ti iggem na a samurai.
Rumrumwar a ti nangrugyan ti nasao a pasamak ket gapu iti lima a ribo a pisos nga inted ti Dept. Agriculture kadagiti mannalon.
Nupay kasta, nagkedked ni Guerero a mangipaay ti ad-adu a detalye mainaig iti nasao a pasamak.
Naglikudan met ni Guerero ti alegasyon kenkuana ti suspek.
Iti laksid iti daytoy, posible a mapilaan ti kaso nga attempted homicide ti suspek gapu iti inaramid na.
Immunan nga inpalawag ni Baptista nga adda ti saan da a pagkinkinnawatan iti kabsat na gapu iti daga.
Rumrumwar a saan a naibaga kenni Baptista a nailakon ti paset ti daga ken ni Guerero itay kallabes.
