LAOAG CITY – Inrakurak ti British Government a kasapulanna ti tunggal empleado nga addaan ti digital identity document.
Inbatad ni Prime Minister Keir Starmer a babaen iti daytoy a wagas ket masolbar ti illegal migration ken mangkissay iti pangta manipud iti populist Reform UK party.
Iti panagsaritana iti Global Progress Action Summit a kaduana dagiti lider ti Canada, Australia ken Iceland, inlawlawag ni Starmer a ti left-leaning Labour government-na kas kadagiti dadduma ket “squeamish” maipapan iti panagsasarita mainaig kadagiti botante iti imigrasion.
Kunana a daytoy ti nangipalubos kadagiti partido a kas iti Reform UK a makagun-od iti kinalatak a binigbigna a ti partido nga indauloan ti beterano iti Brexit a ni Nigel Farage ket mabalin a kangrunaan a karit ti Labour iti sumaruno nga eleksion a maisayangkat inton 2029.
Kabayatanna, ipakita ti panagbutos a ti imigrasion ti maysa kadagiti kangrunaan a pakaseknan dagiti botante a Briton kalpasan ti gastos ti panagbiag ket marikna ni Starmer ti nakaro a panangpilit a mangpasardeng kadagiti tattao a sumrek iti pagilian iti ilegal babaen ti panagballasiwda iti baybay kadagiti babassit a balsa manipud idiay France.
