LAOAG CITY – Ibilang ti aktor a ni Buboy Villar nga “answered prayer” ti panagkapia dan iti dati a partner na a ni Angillyn Gorens.
Iti Fast Talk with Boy Abunda, inbatad ni Buboy nga iti panagsina da ken ni Angillyn ket awan ti sabali a nangikamangan na iti pannakaurnus ti susik iti nagbaetan da no saan a ti namarsua, aglalo ket addaan da ti dua nga anak.
Kuna na a kanayun ti panangikararag na iti Diyos a maikkan da ti gundaway ken ni Angillyn a mangurnus ti saan da a nagkinnaawatan para laengen iti dua nga annak da.
Naragsak a nangipakaammo ni Buboy a nagpinnakawan dan kenni Angillyn, isut gapuna a napinpintasen ti co-parenting set-up da para kadagiti annak da.
Innayon ni Buboy a nautub na nga adda dagiti banag a kayat a mapasamak a dagus, ngem adda met dagiti gundaway a nasken paylaeng isuko iti Diyos ken isunan ti makaammo a mangipaay iti tartarigagayan iti umiso a panawen ken oras.
Maipalagip nga inakusaran ni Angillyn ti aktor a dangdangran na daytoy ken saanna pay a supsuportaran ti dua nga anak da, banag a naglikudan met ni Buboy.
