LAOAG CITY – Naiyalat ti Bucanegan Debate Team ti Senior High School ti Ilocos Norte National High School ti Grand Champion iti UP Namnama Bucanegan Debate 2023 a karaman iti 41st Sirib Quiz Show and 14th Saririt Cultural Festival, Provincial elimination nga insayangkat ti UP Namnama idiay siudad ti Baguio.
Mainaig iti daytoy, inpakaammo ni Mr. Jerry Carreon, principal ti nadakamat a pagadalan a daytoy ti kaunaan a gundaway a panagbalin ti eskuelada a “back to back champion” iti nasao a kompetisyon.
Malaksid iti daytoy, impalgakna a daytoy ti umuna a gundaway nga amin a team ti INNHS Debate Society a nakipartisipar iti kompetisyon ket simrekda amin iti “break rounds”.
Kabayatanna, inlawlawag ni Mrs. Elizabeth de la Cruz a maysa kadagiti nagbalin a coach iti short film making a nagun-ud met ti teamda ti “best in sound effects” iti pelikula nga insalip da a napauloan ti “Abel”.
Naammoan a malaksid iti INNHS ket adda pay dagiti sabsabali nga eskuela ditoy probinsia a nakipaset iti nasao a kompetisyon ken adda met dagiti naiyawidda a pammadayaw.
Maibilang ditoy ti San Nicolas National High School a kampeon iti Best Short Film Making ken Best in Cinematography ken ti estudiante dagitoy a ni Precious Kyle Bernardo ket maikadua a puesto iti Essay Writing English idinto a ti Bingao National High School ti kampeon iti Ilocano Folk Dance Competition ken 2nd Runner Up iti Speech Choir Competition.
Mainaig iti daytoy, inpadanon ni Gob. Matthew Marcos Manotoc ti panangkablaawna kadagiti kakailian a nangibagi iti Ilocos Norte iti nasao a kompetisyon kangrunaanna kadagiti nangiyalat iti pammadayaw.
