LAOAG CITY – Agtultuloy ti aktibidad ti maysa nga aktibo a bulkan ditoy pagilian.
Basar iti rakurak ti Philippine Institute of Volcanology and Seismology, naalaan ti sumagmamano a camera footages manipud iti RasPiCam ti bulkan Mayon Observatory ti Strombolian Activity ken lava effusion iti summit crater ti bulkan Mayon ita nga aldaw, Hulio 14.
Agtultuloy ti effusive eruption ti bulkan iti uneg ti agsasaruno a 200 nga aldaw a mangiriruar ti incadescent lava flows ken rockfalls manipud iti crater.
Mainaig iti daytoy, agtaltalinaed ti Alert Level 3 iti aglawlaw ti Mayon, no sadinno ket manamnama ti agtultuloy a kanayonan pay a panagbettak.
Gapo iti daytoy, naiget nga ipawpawil ti panagserrek iti uneg ti 6 a kilometro a Permanent Danger Zone (PDZ).
Nagballaag pay ti Philippine Institute of Volcanology and Seismology kadagiti residente ken turista a liklikanda ti agturong iti nadakamat a lugar gapo iti posible a panagbettak, panagtennag ti bato ken panagruar ti lava.
Ti agtultuloy nga aktibidad ti Bulkan Mayon ket maysa kadagiti kaatidugan nga effusive eruption a nairekord iti bulkan.
