LAOAG CITY – Nagbalin a negatibo ti birok dagiti negosio iti Pilipinas idi Hulio 2026 gapu iti kabaroan a panagkaro iti tension iti Middle East, panagngato ti presio ti langis ken agtultuloy a pangta ti inflation.
Basar iti kabaroan a Business Expectations Survey (BES) ti Bangko Sentral ng Pilipinas (BSP), bimmaba ken nagbalin a negatibo ti overall confidence index (CI) idi Hulio manipud iti panagbalin a neutral idi Hunio.
Nupay nagtalinaed ti positibo dagiti sumagmamano a kompania iti prospekda para iti sumaruno a 12 a bulan, nababbaba latta daytoy kumparar kadagiti napalabas a bulan gapu iti manamnama a panagkapuy ti ekonomia ken agtalinaed a nangato ti inflation nga lumabes iti 4 percent ceiling ti Bangko Sentral ng Pilipinas.
Gapu iti manamnama nga ad-adda a nakapuy a panagdur-as ken nangato a magatang, basbassit ti kompania ti agplanplano ti kanayonan nga empleado inton sumaruno a tawen.
Kabayatanna, inbatad ti intension dagiti sumagmamano a kompania manipud iti sektor ti indistria a palawaen ti operasionda kadagiti umay a bulan.
Agtultuloy met a banbantayan ti Bangko Sentral ng Pilipinas ti epekto ti tension iti Middle East iti garaw dagiti investors ken buyers, nga usaren a pangibasaran iti panangbukel iti pagalagadan pampinansial ti pagilian.
