LAOAG CITY – Manamnama a ma-isyuan dagiti meat vendors a nakapwesto kadagiti sumagmamano a barangay ditoy ciudad ti Laoag.
Daytoy ket kalpasan a kiniddaw ti Business Permit and Licensing Office ditoy ciudad ti pammalubos ni Mayor Michael Marcos Keon.
Segun ken ni Ms. Antonnette Bareng, mangidadaulo ti Business Permit and Licensing Office ditoy ciudad ti Laoag a dagitoy a meatshop ket adayo iti merkado, sumagmamano kadagitoy ket manipod iti Barangay Raraburan, Bacsil, Lagui-Sail, Lapaz, Apaya, Caoacan ken Salet-Bulangon.
Kunana a makatulong daytoy kadagiti consumer nga adayo iti merkado publiko ditoy ciudad nangruna no karne laeng ti gatangen da.
Inlawlawag ni Bareng a saan met a mapukawan dagiti meat vendor iti merkado publiko gapu ta agbayad latta dagiti adda iti ruar ti buwis.
Kabayatanna, 15 a meat shop ti naaprobaran ken manamnama a ma-isyuan ti business permit.
Maipalagip a nabayagen nga insardeng ti City Government ti panag-isyu iti permit nangruna kadagiti adda iti ruar ti merkado publiko gapu ta agriri dagiti vendors a nakapwesto iti uneg ti merkado ta mabalin nga ad-ado dagiti aggatang iti ruar gapu iti nababbaba a presyo.
