LAOAG CITY – Ad-adda pay a mapapigsa ti calamity fund babaen ti 2025 national budget tapno maipaay ti al-alisto ken naintiempuan a tulong kadagiti komunidad, nangruna ita a mapaspasaran ti pagilian ti agsasaruno a bagyo.
Para iti sumaruno a tawen, ti Senado ket nangiyalokar ti ₱21 bilion iti National Disaster Risk Reduction and Management Fund iti sidong ti naisingasing a ₱6.352 trilion a national budget ken daytoy ket ₱500 million a nangatngato no idasig iti 2024 budget.
Segun ken ni Poe, ti nayon a pondo para iti disaster response ket tapno maipaay ti madagdagus a kasapulan dagiti umili tunggal adda didigra.
Suportaran met ti agpanpanday-linteg ti quick response fund ti Department of Social Welfare and Development no sadinno nga isuda ti forefront no adda didigra a sumangbay.
