LAOAG CITY – Inakusaran ti Cambodia ti Thailand iti kumarkaro a panangbombana iti pagin-innagawan a border areas.
Daytoy ket iti baet a nagatendar dagiti sumagmamano nga opisial ti dua a pagilian iti multi-day meeting a gagem a mapagsasaritaan ti pannakaisardengen ti rinnupakda.
Gapu iti agtultuloy a gubat, addan ti sumurok 40 nga indibidual ti natay idinto nga agarup maysan a milyon ti timmalawen kadagiti dua a pagilian.
Manamnama nga agtaripnong dagiti Defense Ministers manipud iti Cambodia ken Thailand inton bigat idinto a naisayangkat ti maikatlo a panagsinnarita dagiti opisial ti dua a pagilian iti border checkpoint.
Nupay kasta, inrakurak ti Defense Minister ti Cambodia a ti militar ti Thailand ket nangiwayat ti nakaro a panagbomba kadagiti pagin-innagawan a border areas iti probinsia ti Banteay Meanchey.
Inpetteng met ti Thailand a dagiti puersa ti Cambodia ket nangiwayat ti nadadagsen a panangatake a nagpatpatnag iti probinsia ti Sa Kaeo a nangitunda ti pannakadadael kadagiti sumagmamano a pagtaengan.
Binabalaw ti dua a pagilian iti tunggal maysa iti panangiwayat ti baro a rinnupak a dimmanon kadagiti nagduduma a paset ti probinsia.
Maipalagip a nangaramid ti katulagan ti Estados Unidos, China ken Malaysia tapno lippasen ti lima nga aldaw a makapatay a rinnupak idi Hulio ngem saan a nagbayag ti tigil-putukan.
Immuna iti daytoy, inpakaammo ni Cambodian Prime Minister Hun Manet iti online a nakasaritana babaen ti telepono ni United States Secretary of State Marco Rubio no sadinno a napagsaritaanda dagiti nagduduma a wagas iti panangipatungpal ti ceasefire iti Cambodia–Thailand border.
