LAOAG CITY – Nagsagaba ti 2nd degree burn ti maysa a lalaki kalpasan ti napasamak a grassfire ti plantasyon ti kape ti paset ti Sitio Lammin, Barangay Estancia, Piddig, Ilocos Norte.
Nabigbig daytoy a ni Johnny Olsic, agtawen ti 44, naasawaan, caretaker ti nasao a plantasyon ken taga Barangay Barbaqueso idiay ili ti Carasi.
Naamoan a nangrugi ti apoy ti kabanbantayan a paset ti nasao a plantasyon.
Segun ti PNP, inkarigatan ti biktima a sebseban ti apoy ngem napaay ken nangitunda pay ti panagsagaba na ti 2nd degree burn.
Gapu ti kapigsa ti angin ken kinabara ti panawen ket alisto a nagramram ti apoy.
Iti agdama, nagtalinaed ti biktima iti Mariano Marcos Memorial Hospital and Medical Center idiay ciudad ti Batac.
