LAOAG CITY – Natay ti maysa a lalaki kalpasan a nagbekkel usar ti tali iti paset ti Sitio Atimon, Barangay 42, Apaya ditoy ciudad ti Laoag.
Nabigbig daytoy a ni Mr. Napoleon Alonzo, agtawen ti 53, addaan ti live in partner, caretaker ti piggery farm ken security guard ti telecommunications, ken residente iti Barangay Cavit ngem agnanaed iti Barangay Apaya ditoy ciudad.
Segun kenni Mr. John Ronald Bangloy iti Barangay Calayab, nakakita iti biktima, adda kuma ti mapan na alaen iti bodega feeds iti nasao a piggery idi nakita na ti bangkay ni Alonzo.
Inbatad na a ti laeng ammo na ket adda ti nagriryan ni Alonzo ket iti live-in partner na ngem saan na nga ammo ti rason.
Rumrumwar a sakbay a nagpakamatay ni Alonzo ket binagkong na ti live in partner na kalpasan a maipagarop a rimmaot iti ayan ti babai a nakasugatan ti bukot na.
Kunana a sakbay ti nasao a pasamak ket awan met ti nadlaw na a naidumduma a tignay ni Alonzo nga isu kuma ti mabalin a nangiduron kenkuana tapno agpakamatay.
Kabayatanna, kuna ni Barangay Kagawad Romeo Lorenzo iti Barangay Apaya ditoy ciudad a ti problema iti nagbaetan ni Alonzo ken iti live in partner na ket gapo iti imon.
Inlawlawag na basar iti palawag ti live in partner ket maipagarop a planon ni Alonzo a papatayen isuna.
