LAOAG CITY –Inpakaammo ti City Disaster Risk Reduction and Management Office (CDRRMO) a napintas ti nagbalin nga assessment da iti naisayangkat a simultation exercises iti Ilocos Norte National High School ditoy siudad ti Laoag.
Daytoy nga aktibidad ket nagbibinuligan iti Philippine National Police (PNP) Laoag, City Disaster Risk Reduction and Management Office (CDRRMO), Department of Public Safety (DPS), Schools Division Office (SDO) Laoag, Newly Appointed Police Non-Commissioned Officer (NAPNCO), Special Weapons And Tactics (SWAT), ken Scene of the Crime Operatives (SOCO).
Segun ken ni Dr. Melvin Manuel, mangidadaulo iti City Disaster Risk Reduction and Management Office (CDRRMO) ditoy a naissuro kadagiti estudiante kasta payen dagiti mangisursuro no ana ti aramidenda no kasta nga adda dagiti pangta ti pammaltog wenno hostage iti uneg ti pagadalan.
Inlawlawagna a ditoy a nasuroan dagiti estudiante no ana ti aramidenda a panangsalaknib iti bagbagida kas iti panaglemmeng, panangirikep ti ridaw kadagiti classroom ken nagduduma pay.
Mainaig iti daytoy, kunana nga addanto manen ti maisayangkat a simulations drill kadagiti sabali pay a pagadalan no sadinno a daytoy ket para met iti bombing incident.
Kunana a gagem daytoy a maprotehiran dagiti estudiante ken maprebentaran ti aniaman a man nga insidente.
