LAOAG CITY – Agtultuloy ti panangipatungpal ti City Environment and Natural Resources Office (CENRO) ti ‘No Segregation, No Collection’ policy kadagiti amin a barangay ditoy siudad ti Laoag.
Segun ken ni Ms. Mylene Pascual, ti mangidaulo ti City Environment and Natural Resources Office (CENRO) a naragsak daytoy a mangipakaammo a makiparpartisipar dagiti amin a barangay iti panangipatungpal iti nasao a pagalagadan.
Kunana a napateg ti partisipasion dagitii barangay officials ti panangipatungpal iti nasao a pagalagadan.
Inbatadna nga adda laeng dagiti sumagmamano wen dua agingga tallo a pagtaengan kadagiti barangay ti saan a sumursurot iti pagalagadan.
Mainaig iti daytoy, kuna ni Pascual a malakasid iti panangipaganetget ket ti pannakaipaay ti importansia ti panangipatungpal ti “TRASH-TO-CASH” program kas paset ti panangmodernisa ti sistema ti panangmanehar iti basura.
Ti “TRASH-TO-CASH” program ket ti panaggatang ti Laoag City Government kadagiti basura a mabalin pay laeng a ma-recycle kas koma kadagiti plastics ken landok a daytoy ket kas paset ti panangsaluad iti aglawlaw ken nayon a pamastrekan.
Kabayatanna, nagpannawagan ni Ms. Pascual kadagiti umili a saan nga agibelleng iti basura kadagiti maipawil a pagibellengan a lugar, gapu ta kunana a uray agtudo ke agbagyo ket regular latta ti panagkolekta dagiti garbage collectors iti siudad.
