LAOAG CITY – Nagpalagip ni Mrs. Mylene Pascual, mangidadaulo ti City Environment and Natural Resources Office ditoy siudad ti Laoag iti publiko kalpasan nga adda dagiti basura a nagtatapaw kagiddan ti Bagyo Kiyapo.
Segun kenkuana, daytoy ti mangipasimudaag nga iti baet ti naiget a panangitandudoda ti umno a panagibasura ket adda latta ti sumagmamano a residente ti saan a sumursurot iti pagannurotan.
Inbatadna a dakkel ti epekto ti saan a panangsurot kadagiti maipatpatungpal a pagalagadan gapu ta mangitunda ti nakaro a panaglayos kadagiti kalsada ken barangay.
Inlawlawagna a saan a nagkurang ti pammalagip ti opisinada ken dagiti opisial ti barangay kadagiti residente iti umiso a panagibasura.
Innayonna a nasaysayaat nga urnongen dagiti basura a mabalin pay a mailako imbes nga agkaiwarang a mangitunda ti pannakaabbeng iti pagayusan ti danum.
