LAOAG CITY – Saan nga umanamong ni Sangguniang Panlalawigan Member Jonathan Torralba, Chairman ti Committee on Agriculture ditoy probinsia iti importasion ti sibuyas ditoy pagilian.
Segun kenkuana, dakkel a kalaban dagiti mannalon dagiti imported a sibuyas.
Inbatadna a saan a kasapulan ti panag-import wenno panagangkat gapu ta adu met ti suplay nangruna ita nga harvest season.
Inlawlawagna a malaksid iti importasion, adda pay dagiti smuggled nga ad-adda manen a mangpatay iti industria ti sibuyas pakairamanan ti bawang gapu ta nalaklaka ti presio dagitoy isu a mapilitan dagiti aglaklako nga ilaka met ti presioda.
Innayonna a kalikagumda nga adda met ti mapastrekda ken mapasubli ti puonanda ket no adda dagitoy a kalabanda ket narigat a mapasamak daytoy.
Maipalagip a ti gobierno nasional ket nagangkat ti tonelada a puraw ken nalabbaga a sibuyas gapu ta mamatida a daytoy ti mangalay-ay ti presio.
Kabayatanna, naammoan a manamnama a sumangpet dagitoy inton bigat Pebrero 20.
