LAOAG CITY – Inbatad ni Engr. Rommel Batuac, ti Chief Operations ti National Irrigation Administration a limitado laeng dagiti maipapaay a libre a krudo kadagiti mannalon nangruna kadagiti maapektaran ti tikag iti panawen ti kalgaw.
Segun kenkuana, ti nailatang a pundo ti National Irrigation Administration ket maiyalokar laeng para kadagiti maseknan a mannalon a makapaspasar ti panagkurkurang ti danum.
Inlawlawagna a babaen iti daytoy ket adda ti mangsupusop kadagiti pagkasapulan dagiti mannalon iti panagtalon dagitoy.
Kunana nga umabot laeng ti 100 a litro ti krudo ti maipaay kadagiti kangrunaan nga agkasapulan a mannalon ditoy probinsia.
Inpalgakna nga iti kallabes ket addan ti naited a 100 a litro a krudo ken dagiti hose a masapol iti panagpadanum ken panagtalon dagiti mannalon iti North Main Canal Irrigators Association.
Maipalagip a nagkiddaw ti nasao nga asosasion kalpasan a kurang ti naawatda a grupo a mausar iti kataltalonanda.
