LAOAG CITY – Nagballag ni Chinese President Xi Jinping ken ni US President Donald Trump a mabalin nga agtungpal iti “giyera wenno naiget a komprontasyon” ti dua a pagilian no agkamali ti addang mainaig iti isyu ti Taiwan.
Inrakurak daytoy ti Chinese President iti pormal a summit meeting da ken ni Trump iti Great Hall of the People iti Beijing.
Iti panagbitla ni Xi, inpetteng na a ti isyu ti Taiwan ti kasensitiboan ken kapatgan nga isyu iti nagbaetan ti Estados Unidos ken China.
Basar pay kadagiti report iti media iti China, inpaganetget ni Xi a no saan a naurnus ti pannakaiwanwan ti nasao nga isyu, maikabil iti risgo ti sitwasyon ti relasyon ti dua a nabileg a pagilian.
Indeklarar ti lider ti China a ti ideya a panagwaywayas ti Taiwan ken kapia iti rehiyon ket arigna danom ken apoy a kaanuman ket saan pulos nga agkasurutan.
Sakbay pay ti close-door meeting, nabara ti panangrugi ti dua nga aldaw a summit no sadinno a dinayaw ni Trump ni Xi kas maysa a naindaklan a lider ken pagayam.
Kabayatan a seryoso ni Xi iti isyu ti Taiwan, ad-adda a nakatutuk met ni Trump iti pannaki-negosyar tapno masolbar ti trade war, partikular ti panaggatang ti China kadagiti agricultural products, enerhiya, ken dagiti eroplano manipod iti Estados Unidos.
