LAOAG CITY – Nauram ti circuit branch a para iti air condition nga us-usaren ti Dohan Food House iti paset ti Rizal St. iti Barangay ditoy ciudad ti Laoag.
Segun kenni SFO2 Venner B. Adina, ti Chief of Operation iti BFP Laoag, nagrisak ti circuit branch ti aircon nga adda iti ruwar ti nasao a pasdek.
Inbatad na a nangrugi ti uram iti 12:03 itay aldaw ken naideklara a fire out iti 12:05.
Mainaig iti daytoy, idi nagrisak ti circuit branch ket dagus a rimuar dagiti tattao iti uneg ti pasdek ken nagusar dagiti agtagikua ken empleado ti Fire extinguisher.
Dagus da met a timmawag iti Bureau of Fire Protection ken naamoan nga awan met ti nasugatan.
Agpapan maisursurat ti damag ket saan pay a nadeterminar no mano ti balor ti nadadael gapo iti uram.
