LAOAG CITY – Gimmatangen ti City Government of Laoag ti decibel meter a mausar dagiti kapulisan tapno tingitingen dagiti mapatawan ti citation ticket gapu iti nalabes a ringgor ti tambutso dagiti lugan.
Segun ken ni Mayor James Bryan Alcid, namunganay daytoy kalpasan nga adda dagiti sumagmamano a reklamo nga awan ti ramit nga us-usaren dagiti kapulisan.
Inbatadna a babaen iti daytoy ket manamnama nga addanton ti usaren dagiti kameng ti Philippine National Police – Traffic Division kadagiti sumarsaruno a panangiwayatda a panagsita kadagiti aglabsing iti pagannurotan.
Inlawlawagna a nasayaat ti pannakaipatungpal ti nasao a linteg nangruna ket nabayagen daytoy a naipasa.
Gapu iti daytoy, kunana a maliklikan ti disgrasia ken pannakaistorbo dagiti residente ditoy siudad aglalo iti rabii.
Maipalagip nga immunan a kinumpirmaran ni Police Chief Master Sergeant Eric Bumagat ti mangidadaulo ti Laoag City Police Station – Traffic Division a rinugiandan ti pannakaiyimplimentar daytoy a linteg idi Disiembre 22, 2025 ken manamnama nga agtultuloy daytoyen.
Naammoan a 95 decibel ti rumbeng a kapigsa laeng dagiti lugan ken no lumabes ket mapatawan ti pannusa.
Immuna iti daytoy, awan ti us-usaren dagiti kapulisan a decibel meter isu nga ibasarda laeng ti panagdengngegda ti patawanda ti pannusa.
