LAOAG CITY – Balligi a nakipaset ti City Government of Laoag iti 2nd Quarter a Nationwide Simultaneous Earthquake Drill.
Inpakaammo ni Dr. Melvin Manuel, ti head ti City Disaster, Risk, Reduction, Management Office a ditoy a naipakita iti kinasagana, kina-alisto ken panagkakammayet dagiti nadumaduma nga ahensia ti siudad a naiwayat iti Barangay Pila.
Daytoy ket nakipartisiparan dagiti residente iti nasao a barangay ken kasta payen dagiti agad-adal ti elementarya.
Kunana a gagem daytoy nga aktibidad iti agtultuloy a panangipapaadal ken pannaka-isuro iti kinasagana ti tunggal maysa no adda ti kalamidad kangrunaannan ti gingined ken uram.
Innayonna a saan a mapakpakadaan ti didigra ngem malimitaran ken malappedan ti pannakairisang ti biag babaen kadagitoy a panagsagsagana.
Kabayatanna, kunana kalikagom ti City Government a babaen ti administrasion ni Mayor James Bryan Alcid a tunggal umili ket ammoda ti ar-aramidenda no panawen ti didigra kasta metten iti kina-alisto dagiti rescue units ti siudad.
