LAOAG CITY – Ado dagiti plano iti City Tourism Office ditoy ciudad ti Laoag para kadagiti kalesa.
Segun kenni Mrs. Mary Jane Leaño, Officer in Charge iti City Tourism Office, kasapolan pay iti ad-ado nga oras ken panawen tapno maiplastar dagiti plano da para kadagiti kalesa ditoy ciudad.
Inbatad na nga addan ti pannakisarita da kadagiti hotels ken travel agency nga iraman da dagiti kalesa no adda dagiti turista a kayat na ti agpasiar iti nagduduma a lugar ditoy ciudad tapno isu iti pagluganan da.
Kunana a ti maysa pay a plano kadagiti operator wenno kutsero ket mapagbalin da a tourist ambassador tapno ad-adda a maallukoy dagiti turista nga aglugan iti kalesa.
Innayon na nga iti agdama ket in-inot ti maipapaay a tulong kadagiti kalesa tapno saan a mapukaw ditoy ciudad gapu ta maysa da kadagiti tumultulong iti panagpatalinaed kadagiti turista ditoy ciudad.
