LAOAG CITY – Maimbitaranen inton sumaruno a panagdengeg ti Senate Blue Ribbon Committee da resigned Cong. Elizaldy Co ken dati nga Speaker Ferdinand Martin Romualdez tapno pagpalawagen iti kontrobersial a nakairamananda iti maanomalya a flood control projects.
Inbatad ni Senate Blue Ribbon Committee Chairman Ping Lacson a mangipatulod ti komite ti invitation letter ken ni Co iti address-na ditoy pagilian.
Nupay kasta, dinakamat ti Senador nga adda iti ballasiw taaw ni Co isu nga adda ti tsansana a saan daytoy nga agpakita.
Inlawlawagna a no saan a sumango iti panagdengngeg ni Co ket sumaruno a mapatulodan daytoy ti subpoena ken no bilang saan latta nga agatendar ket maisyuan isuna ti show-cause order tapno pagpalawagen no apay a saan a nasken nga i-contempt ti Blue Ribbon.
Kuna ni Lacson, no saanda a mapnek iti palawag ni Co iti show-cause order ket maiyatnag ti pammilin a pannaka-contempt ditoy a sarunoen ti pannakaiparuk-at ti warrant of arrest.
Kabayatanna, kas panangbigbig ti tradision ti inter-parliamentary courtesy, ti imbitasion para ken ni Romualdez ket maipadalan ken ni House Speaker Faustino Dy III.
