LAOAG CITY – Inpetteng ti Department of Energy (DOE) a saanda nga ikkaten ti moratorium wenno panangipawil iti panangipatakder kadagiti baro a coal-fired power plant iti pagilian.
Daytoy ket iti baet nga adda ti mapaspasaran a krisis iti langis iti Middle East.
Inbatad ni Energy Secretary Sharon Garin nga umdas ti agdama a suplay ti koriente manipud kadagiti maipatpatungpal a kontrata isut gapuna a saanda a kasapulan a mangnayon ti baro a coal plants imbes ket tutukan ti ahensia iti agtultuloy a manarimaan a proyekto.
Mapalubosan dagiti agop-operar a coal plant a nayonan ti produksionda tapno makatulong iti panangkontrol iti panagngato ti presio ti koriente gapu ta nalaklaka maidasig iti liquefied natural gas (LNG).
Daytoy ket paset ti gagem ti Philippine Energy Plan nga ipangato ti paset ti renewable energy iti 35 a porsiento apaman a madanon ti 2030 ken 50 a porsiento iti 2040.
Maipalagip nga idi 2025, umaboten iti 25 a porsiento ti renewable energy share idinto a ti coal ket bimmaba ti 56.6 a porsiento ti pakabuklan a power generation.
