LAOAG CITY – Adda ti panag-pangadua ni Commission on Elections (Comelec) iti mailunglungalong a mandatory drug test kadagiti kandidato ken dagiti elected officials.
Segun kenni COMELEC Chairman George Garcia, saan met a mandatory iti drug test ngem adda dagiti boluntaryo a dumalan a kandidato kageddan ti panangipila da ti certificate of candidacy.
Inbatad na a ti lungalong a dumalan iti drug testing dagiti elected ken appointed official ket napintas ngem addaan daytoy legal implication a masapol a tutukan.
Nakalanad iti ruling ti Supreme Court nga awan ti karbengan ti Comelec a diktaran dagiti kandidato a dumalan iti drug testing ken ti nasao a wagas ket unconstitutional.
Reaksyon daytoy ti COMELEC Chairman iti lungalong ni Davao City District 1 Rep. Paolo Duterte a mamandar amin dagiti elected ken appointed officials karaman ti presidente tii pagilyan a dumalan iti mandatory random drug test iti kada innem a bulan.
