LAOAG CITY – Naiget a naglikudan ni Commission on Elections Chairman George Erwin Garcia ti pannakairaman ti naganna iti alegasion nga adda ti sumagmamano nga opisial ti gobierno a maipagarup nga immawat ti kuarta manipud ken ni Zaldy Co.
Daytoy ket kalpasan a rimmuar ti nagan ni Garcia iti naiwayat a press conference dagiti nagpabigbig a 18 a dati a miembro ti Philippine Marine Corps a nangibaga a maipagarup a nangikabilda kadagiti maleta a naglaon ti minilyon a pisos para kadagiti sumagmamano nga opisial ti gobierno.
Inbatad ni Garcia a nalawag iti rakurak dagiti nagpabigbig a dati a suldado nga awan ti maipaayda a detalye no kaano a napasamak ti panangited kadagiti kuarta.
Inlawlawagna a nasken a nakailanad iti aniaman nga akusasion ti eksakto a panawen wenno oras no kaano a napasamak ti insidente.
Para ken ni Garcia, awan ti maipaay a detalye dagitoy gapu ta awan ti napasamak a panagginnawat ti kuarta ken saan a pudno ti pammabasolda kenkuana.
Gapu iti daytoy, ad-adalenna no mangipila isuna ti reklamo kontra kadagiti 18 a nagpabigbig a miembro ti Philippine Marines ngem inadmitirna a maasian kadagitoy gapu ta mamati isuna nga us-usaren laeng isuda dagiti sumagmamano nga indibidual nga addaan ti bukud nga agenda wenno interes.
