LAOAG CITY – Inpakammo ni Atty. Julius Balbas, ti Election Officer ditoy ciudad ti Laoag a nakasagana dan para iti panangawat kadagiti Certificate of Candidacy kadagiti agkalikagom nga agpaidasig para iti Barangay ken Sang. Kabataan Elections.
Segun kenni Balbas, saan nga iti opisina da ti pagipilaan ti Certificate of Candidacy no diket iti Laoag City Auditorium manipud iti alas-otso iti bigat agingga iti alas-singko ti malem kas basar iti resolusyon.
Kageddan iti daytoy ket immapela ni Balbas kadagiti agkalikagom nga agpila iti Certificate of Candidacy da nga isapsapa da ti mapan iti Laoag City Auditorium gapo ta adda ti baro a proseso kas iti registration ken age requirement.
Karaman kadagiti kitaen da a nalaing ket no registered voter met laeng ti maseknan iti barangay na ken iti Sang. Kabataan ket iberipikar da no saan a nalablabes ngem 24 ti tawen na.
Inlawlawag na a ti voting centers para iti umadani nga eleksyon ket kadagiti pagadalan ken kadagiti lima barangay hall ditoy ciudad ti Laoag.
Mainaig iti daytoy, kuna ni Balbas a pabor a kadagiti Malls ti pagbutusan nangruna ket mas accessible dagitoy a maysa kadagiti bentahe na.
Kabayatanna, pinalagipan manen ni Balbas dagiti agpila ti Certificate of Candidacy ken no maikonsideraren a kandidato iti eleksyon ket nasken a suruten ti panawen ti panagkampanya, personal man wenno iti panagpost iti online.
Innayon na nga addan to met ti guidelines ti komisyon seknan kadagiti tarpaulin wenno posters dagiti kandidato.
