LAOAG CITY – Inlawlawag ti maysa a private lawyer a ni Atty. Juanito Antonio mainaig iti Confirmation of Charges ni dati a Presidente Rodrigo Duterte.
Segun kenkuana, maiyarngi daytoy iti criminal jurisdiction ditoy Pilipinas ti preliminary investigation no sadinno a paneknekanda babaen ti panangtingitingda kadagiti naidatag nga ebidensia kadagiti reklamo.
Inbatadna a no makita dagiti mangimbestigar nga adda ti umdas a pangibasaranda ket mangaramidda ti maysa a resolusion tapno maiyuli ti darum ken marugian ti pannakatingitingna iti korte.
Mainaig iti daytoy, inpakaammo ni Atty. Antonio a no mapaneknekan nga adda ti substantial grounds kadagiti ebidensia ket ditoy a mangrugin ti pormal a panagdengngeg ti kaso a sangsangoen ti akusado.
Kunana a ditoy nga idatag ti prosekusion dagiti ebidensia tapno ipaneknek ken ipakitada a dagitoy dagiti nagbasolan ti akusado sakbay ti Pre-Trial Chamber.
Innayonna a ti kangrunaan a gagem iti imbestigasion ket no pudno a ni dati a Presidente Duterte ti akin-utek wenno nangidaulo iti panangipatungpal ti nadara a panagkampania ti iligal a droga wenno ti war on drugs a nakatayan ti rinibribu a biktima.
