LAOAG CITY – Nakakiddaw ni Cong. Ferdinand Alexander “Sandro” Marcos ti naruay a tulong para kadagiti kakailian iti umuna a distrito ti probinsia.
Segun ken ni Marcos, kas senior deputy majority floor leader ket naruay dagiti pakakumikumanna iti kongreso.
Nupay kasta, kuna na a kanayon a ti pagimbagan ti probinsia ti panpanunutenna.
Inbatadna nga iti panagsursursurna kadagiti nagdumaduma nga ahensia ti gobierno tapno agkiddaw ti pondo ket maipaayna ti inkarina kadagiti kakailian.
Mainaig iti daytoy, inpakaammo na a nakakiddaw iti 100 a milyon a pisos para iti programa nga Assistance to Individuals in Crisis Situation wenno AICS.
Kuna na a malaksid iti daytoy, nakakiddaw pay ti 150 a milyon a pisos para iti programa a Tulong Panghanapbuhay sa mga Disadvantage/Displaced Workers wenno TUPAD.
Kunana nga adda pay ti nakiddaw na a 150 a milyon a pisos para iti Medical Assistance to Indigent Patients wenno MAIT ken sabali pay a 150 milyon a pisos para iti Local Government Support Fund wenno LGSF.
Segun kenkuana, daytoy ket paset ti panangtungpal na iti panangirakurakna iti kallabes a nu maikkan ti gundaway nga agserbi iti umuna distrito ket maipaay ti naan-anay a tulong ken suporta kadagiti umili.
Inlawlawagna nga iti panagsaritad ken ni Pres. Ferdinand R. Marcos Jr. wenno PBBM ket impatalgedna a maipangruna ti Ilocos Norte kadagiti probinsia iti intero a pagilian.
Kabayatanna, inpakaammo ni ti naud-udi a Marcos a bayat ti kaawanna ditoy probinsia ket pinusganna ni Mr. Ryan Remigio a mangkita kadagiti pagkasapulan dagiti umili iti umuna a distrito.
