LAOAG CITY – Natay ti maysa a construction worker kalpasan a binagko-bagkong ti maysa a barangay tanod iti Brgy. Root iti ili ti Dingras.
Nabigbig ti biktima a ni Jay Calasaga y Lanusa, alyas Sultan, agtawen 40, addaan ti live-in partner, construction worker, idinto a ti suspek ket ni Barangay Tanud Jasper Manzanillo y Ballentos, agtawen 43, naasawan, agpada dagitoy a residente iti nasao a barangay.
Basar iti imbestigasyon, kabayatan ti panaggiinom ti suspek ken biktima, kadwa da dagiti pagayam da nga isuda Edwin Salvador ken Jason Tamayo iti pagtaengan ni Manzanillo ket napan immasideg ti live-in partner ti naud-udi ken adda ti nagsinnungbatan da.
Kalpasan ti sumagmamano a minutos nga agsinsinnungbat dagiti aglive-in partner, napan naganawa ti suspek ngem maipagarop a saanna a naanawa dagitoy isut gapu na a nagawid iti balay da ken innala na ti maysa a kutsilyo.
Iti panagsubli na iti ayan dagiti aglive-in partner ket maipagarop a kellaat na lattan a binagko-bagkong ti biktima a nagsagabaan na ti sugat iti nagduduma a paset ti bagi na.
Naitaray a dagus ti biktima iti Dingras District Hospital ngem naideklarar a dead on arrival.
Rumrumuar a napan ni Manzanillo iti kapitan iti barangay Root nga isu ti napan nangisuko kenkuana iti kustodyar ti PNP Dingras.
Agtultuloy ti imbestigasyon dagiti otoridad mainaig iti napasamak nga insidente.
