LAOAG CITY – Inpakaamo ni Mrs. Janet Retamal, mangidadaulo iti City Population and Development Office ditoy suidad ti Laoag nga amin a barangay ditoy suidad ket binulan a masupsuplayan dagiti agas tapno malappedan iti panagsikog a nasapa wenno ti panagsasaruno a panaganak.
Pakairamanan ditoy ket dagiti contraceptives pills ken condom.
Inbatadna a katulunganda dagiti barangay health workers ken Barangay Service Point Officer a mangipaay kadagitoy kadagiti kalikagumna ti maaddaan ti family planning.
Segun kenkuana, mabalinda nga agturong kadagiti barangay tapno agkiddaw ti pills ken contraceptives gapu ta libre dagitoy nga ipaayda.
Mainaig iti daytoy, kuna ni Retamal a sakbay ti panagusar kadagiti nadakamat nga agas ket kasapulan a dumalan pay laeng dagiti indibidual iti doktor tapno masigurado ti kinatalged ken makita no kabaelan ti bagi ti panag-intake kadagiti agas.
Kabayatanna, inpettengna a saan a dakes ti panagusar kadagiti agas gapu ta makontrol iti panagsikog dagiti ubbing a nasapa ken dadduma pay.
