LAOAG CITY – Maladingitan ni Mrs. Divine Sevilla, maysa a Counseling Professional ken ti mangidadaulo iti Speak Up I’m Here program ti Provincial Government of Ilocos Norte kalpasan nga adda dagiti nagsaruno a napasamak a panagbekkel ditoy Ilocos Norte a nangitunda ti pannakatay dagitoy.
Segun kenkuana, dagiti kangrunaan a maidandanon a problema dagiti tumawtawag iti hotline iti opisinada ket gapu iti parikotda maipapan iti family problem, relationship, sagsagabaen a sakit nga amin dagitoy ket agtennag iti pannakapasar ti depression.
Inbatadna a maibasar iti datosda idi tawen 2021 ket ngimmato ti bilang dagiti agpakpakamatay ditoy probinsia idinto a bimmaba met idi tawen 2022 ken awan pay ti datosda idi tawen 2023.
Inlawlawagna a masapol ti naan-anay a pannakaawat kadagiti sumangsango iti nadagsen a problema ken atiddog a pasensiya tapno saanda a makapanunot iti panangkettel iti bukudda a biag.
Mainaig iti daytoy, kunana nga adda dagiti addang nga ar-aramiden iti opisinada iti pannakibinnuligda iti Provincial Gender and Development Office babaen iti panangiyuswatda iti invitational talks kadagiti nagduduma a pagadalan ditoy probinsia.
Ginutigotna dagiti nagannak a dagitoy ti umuna a makaripar ken mangbayabay kadagiti annakda tapno maalay-ayan ti nadagsen a rikriknaen dagiti annakda.
Innayonna a saan nga agpangadua nga umasideg wenno tumawag iti hotline-da a 0921-952-9236 ken 0966-461-0706.
