LAOAG CITY – Maiyur-uray pay laeng ti pammilin manipud iti korte para iti panangiyisyu ti Interpol Red Notice ken ni dati a Presidential Spokesperson Atty. Harry Roque.
Daytoy ti inrakurak ti Department of Justice (DOJ) kalpasan a nasaludsod iti budget hearing ti ahensia ken attached agencies daytoy no ania ti status ti kaso ni Roque a maysa kadagiti naireklamo gapu iti na-raid a Philippine Offshore Gaming Operators (POGO) idiay Porac, Pampanga iti napalabas a tawen.
Inbatad ni Department of Justice Spokesperson Atty. Polo Martinez, aguray pay ti court order para iti red notice ken iti panangkanselar ti pasaportena.
Sumangsango ni Roque iti kaso a qualified human trafficking ken regular human trafficking gapu iti maipagarup nga adda ti pakainaiganna daytoy saan laeng kas maysa nga abugado ti Whirlwind corporation a kompania nga agpapaabang iti compound iti na-raid a Lucky South 99.
Maipalagip nga idi Mayo, nangiparuk-at ti arrest warrant ti regional trial court idiay Pampanga kontra iti dati a pannakangiwat ni dati a Presidente Rodrigo Duterte kalpasan nga adda ti nakita a probable cause iti panaglabsing iti Expanded Anti-Trafficking in Persons Act of 2022.
Iti agdama, nagtalinaed idiay The Netherlands ni Roque a timmalaw ditoy Pilipinas idi pay napalabas a tawen.
