LAOAG CITY – Umaboten iti 2.1 a milyon a pasyente iti intero a pagilian ti nabenepisyaran iti programa ti gobierno a Zero Balance Billing (ZBB) policy no sadinno nga adda metten ti pakabuklan a P135 billion ti libre a nabayadan kadagiti ospital iti uneg ti siyam a bolan.
Inbatad ti Department of Health (DOH) a ti nasao a datos ket sakupen na manipod Hulyo 2025 agingga iti Marso 2026.
Segun ken ni Health Secretary Teodoro Herbosa, epektibo ti nasao a programa tapno maliklikan ti panaggastos dagiti minilyon a Pilipino nga agkalikagom nga agpaagas kadagiti public health facilities.
Ti nasao a pagannurutan ket direktiba ni President Ferdinand R. Marcos Jr., no sadinno a dagiti indigent ken financially incapacitated patients ket saan a rumbeng a pagbayaden para iti medical services kadagiti government hospitals iti intero a pagilian.
