LAOAG CITY – Inbilin ti Department of Agriculture ti temporario a pannakaipatungpal ti import ban kadagiti amin a domestic ken wild bird ti Turkey gapu iti panagwaras ti bird flu iti paset ti Europa.
Segun ken ni Agriculture Secretary Francisco Tiu Laurel Jr., gagem daytoy nga addang ti ahensia a malappedan ti panagserrek ken panagwaras ti nasao a sakit iti pagilian.
Basar iti naiparuk-at a Memorandum order, inbilin ni Sec. Laurel ti panagpasardeng iti panagiyisyu ti sanitary ken phytosanitary import clearances iti importasion ti domestic ken wild bird manipud iti nasao a pagilian.
Mainaig iti daytoy, inpawil ti ahensia ti panagpastrek kadagiti produkto a pinarti sakbay idi Enero 1 ita a tawen.
Naammoan a dagiti sumagmamano a maipawil ket ti karne, day-old chicks, itlog ken dagiti semilya.
Iti inruar a datos ti Turkey iti World Organization on animal health, naaddaan ti panagwaras ti H5N1 High Pathogenicity Avian Influenza idiay Sarayduzu, Merkez Turkey.
