LAOAG CITY – Naiget a kinondenar ni Pope Leo XIV ti panangpapatay ti rinibribu a nangiwayat ti tignay protesta iti Iran ken naminsanna manen nga inpetteng ti panangkontrana iti gubat.
Inaramidna ti rakurak iti maysa a press conference kabayatan ti panagawidna iti Roma kalpasan ti uppat a pagilian a panagbisita iti Africa.
Segun iti Santo Papa, saan a nainkalintegan ti panangpapatay kadagiti inosente nga umili.
Inpaganetgetna a kas maysa nga spiritual lider, saan a mabalin a suportaran iti aniaman a klase ti gubat.
Ti rakurak ket kagiddan ti nagbalin a komento ni United States President Donald Trump a nangkuestionar no apay a saan nga insigida a nagsarita ti Santo Papa mainaig iti situasion iti Iran.
Iti baet a saanna a direkta a sinungbatan daytoy, inpetteng ni Pope Leo ti takderna kontra iti kinaranggas ken gubat.
Dinakamat ti Santo Papa ti agtultuloy a tension iti nagbaetan ti Estados Unidos ken Iran a mangituntunda laeng ti ad-adda a panagrigat kadagiti ordinario nga umili.
Inladawanna ti ceasefire kas riribok ken awan ti nalawag a direksion.
Kabayatanna, inkalintegan ni Pope Leo ti panagbisitana iti sumagmamano a pagilian iti Africa.
Segun kenkuana, gagem ti Vatican a naulimek nga itandudo ti hustisia ken mapasayaat ti kasasaad dagiti tattao nga imbes nga agaramid ti panagkondenar.
