LAOAG CITY – Inlawlawag ni Engr. Shiela Opelac, ti mangidadaulo iti City Agriculture Office ditoy siudad ti Laoag ti rason iti napasamak a fish kill iti Brgy. Metro Gabu ditoy siudad ket ti pannakaserrek iti fish cages ti danom ti baybay.
Inbatadna a tunggal maudi a kuarter ti tawen ken iti umuna a kuarter iti sumaruno a tawen ket agrikep ti sabangan.
Kunana a dagiti tilapia a pupok dagiti mangngalap ket saan a mabalin ti naapgad.
Gapu iti daytoy, inpalgakna a nasaysayaat a ti taraknen dagiti maseknan a mangngalap no madanon iti kastoy a panawen ket dagiti ikan nga adda ti breed-na a mabalin ti naapgad.
Mainaig iti daytoy, nakasagana a tumulong ti lokal a gobierno ditoy siudad ti Laoag babaen iti pannakaipaay ti cash assistance kadakuada iti Assistance to Individuals in Crisis Situation.
Innayonna a mabalin a maikkan ti fingerlings dagiti naapektaran a mangngalap gapu ta amangan laeng ket matay dagitoy.
Maipalagip nga umabot iti dua a ribu a kilo nga ikan ti natay no sadino nasurok 200 a mangngalap ti naapektaran iti daytoy.
