LAOAG CITY – Ad-adda nga epektibo ti proteksion kontra iti ultraviolet wenno UV rays ti dark-colored ken bright-colored a bado ngem iti light-colored a bado basar iti maysa a panagadal a dinakamat dagiti dermatologist, maisupadi iti masansan nga abiso nga agsuot ti puraw a bado tunggal nabara a panawen.
Basar iti panagadal ti American Academy of Dermatology Association, ad-adda a makaipaay ti proteksion kontra iti UV rays ti dark-colored clothes kas ti nangisit pakairamanan ti bright-colored clothes kas ti nalabbaga.
Saan nga umanay ti kabaelan ti light-colored ken pastel-colored a bado a sumagepsep ti UV rays.
Inbatad ni dermatologist Dr. Jean Marquez, napateg a kitaen ti klase ti tela nangruna kadagiti tattao a nabayag a nakapalag iti init.
Inrekomendarna ti dark-colored clothes a naaramid iti tightly woven fabric kas ti nylon, polyester ken lycra para iti natibtibker a proteksion kontra iti singising ti init.
