LAOAG CITY – Sumangsango ti reklamo kriminal administratibo ti dati a sekretario ti Department of Budget and Management (DBM) a ni Amenah Pangandaman mainaig iti alegasion a maipagarup nga anomalya ti panangiyakar ti binilyon a gatad a pundo ti PhilHealth ken Philippine Deposit Insurance Corporation (PDIC) a maipagarup a simrek iti National Treasury.
Ti nasao a kaso ket inpila ni Dr. Tony Leachon a naisubmitir iti Office of the Ombudsman kontra ken ni Pangandaman mainaig iti technical malversation, graft ken nagduduma pay a panaglabsing iti administratibo.
Linaon iti reklamo a kasapulan a mairaman ni Pangandaman nga agsungbat gapu iti papelna daytoy iti pannakaipatungpal dagiti gakat dagiti maanomalya a panangiyakar ti pundo idi nakatugaw pay laeng isuna iti nasao nga opisina.
Kinuna pay ti reklamo a karaman pay ni Pangandaman iti “concerted and coordinated governmental action” iti pannakaimplementar ti fund transfer mechanism nga iti agdama ket kweskwestionaranda.
Iti baet daytoy, awan pay ti opisial a rakurak ni Pangandaman mainaig iti nasao nga alegasion.
Idi Disiembre iti napalabas a tawen, inbilin ti Korte Suprema ti administrasion nga isubli ti P60 billion a gatad a sobra a pundo ti PhilHealth babaen ti 2026 General Appropriations Act (GAA).
Kabayatanna, iti desision ti Supreme Court En Banc ket naideklarar nga unconstitutional ken awan serbina dagiti linteg ti 2024 General Appropriations Act (GAA) ken iti makunkuna a Finance Circular a nagbalin a basar iti pannakaiyakar iti nasao a pundo mainaig daytoy iti grave abuse of discretion.
Immunan a nangipilan ti kaso ni Leachon ti reklamo kontra kadagiti sabali pay nga opisial ti gobierno nga isuda dati a Finance Secretary Ralph Recto, dati a Budget Secretary Rolando Toledo ken dagiti dadduma pay nga opisial ti PhilHealth ken PDIC mainaig met laeng ti kapadana nga isyu.
Basar iti rekord, umabot iti P89.9 billion ti target a maiyakar manipud iti PhilHealth funds ngem P60 billion laeng ti actual a naiyakar kalpasan a linappedan daytoy ti Korte Suprema.
