LAOAG CITY – Inbutaktak ti abogado ni dati a Department of Public Works and Highways USec. Catalina Cabral nga immuna a ginandat ti kliyente na a kettelen ti biagna iti balayna iti baet ti imbestigasyon iti maanomalya a flood control projects.
Segun ken ni Atty. Mae Divinagracia, ti immuna a suicide attempt ni Cabral ket napasamak sumagmamano nga aldaw kalpasan ti panagdengngeg no sadinno nga inraman ti naganna ni Department of Public Works and Highways USec. Roberto Bernardo.
Maipalagip nga inakusaran ni Bernardo ni Cabral ti maipagarop a panangkontrol na iti National Expenditure Program ti ahensya iti babaen idi ti liderato da dati a DPWH Secretaries Mark Villar ken Manuel Bonoan.
Kuna na a ginandat ti dati nga opisyal t dangran ti bukodna a bagi usar ti kutsilyo ngem nalapdan ti anak na a babai ken naagaw na ti kutsilyo manipod kenkuana.
Malaksid iti daytoy, kuna ni Atty. Divinagracia a nagtapwak pay ni Cabral iti agdan ti balayda.
Inladawan ti abogado ti immuna a pananggandat ni Cabral a kettelen ti biagna kas “tipping point” a namonganay iti pannakaikkat na iti pwesto, a naipadalan iti courtesy resignation.
Segun iti abogado, maipagarop a nakiddaw ken ni Cabral a mangisumitir ti resignation na iti baet ti imbestigasyin kalpasan ti 40 a tawen a panagserbina iti DPWH ken naipaidam kenkuana ti retirement pay.
Iti mismo a kaaldawan metlaeng ti pannakatay ni Cabral, namindua a daras a bimmaba iti lugan na iti Kennon Road ken tiningiting na ti kangato ken kauneg ti derraas, maibasar iti palawag ti driver na.
Naobserbaran pay nga agpaspasar ti depresyon ti dati nga opisyal gapu iti kaawan ti ganaygay na a mangan ken tinawtawagan na ti abogado na tapno trataren dagiti banag a nalpasen a napagsaritaan da.
Innayon ti abogado a saan a na-diagnose ti dati nga opisyal gapu ta nagkedked nga agkiddaw ti professional help gapu ta saanna a kayat ti maaddaan ti record a a nagpasar daytoy ti mental illness.
Maipalagip a pimmusay ni Cabral idi Disyembre 18, 2025 no sadinno a nabirukan ti bangkayna iti derraas iti Kennon Road, Tuba, Benguet.
